Alas syete pa lang sang aga nagatabuk na si Nilda Mameng sa footbridge sa Sitio Conchita Villanueva, Barangay Sag-ang, La Castellana, Negros Occidental. Si Nilda nagakadto sa Barangay Health Station Lunes tubtob Biyernes sa paghimo sang iya mga responsibilidad bilang isa ka Barangay Health Worker. Sa edad nga 67, siya maisog kag mabaskog nga nagatabuk sa 25 metros nga footbridge.

Siya isa ka “trained hilot” kag madamo na ang nabuligan nga napabata sa tion sang wala pa ginapatuman ang “no home birth policy” sa Pilipinas. Nagalakat si Nilda sang masobra sa 100 ka metros halin sa ila puloy-an pakadto sa footbridge nga naga angot sang Sitio Conchita Villanueva sa barangay proper. Ang Sitio Conchita Villanueva isa sa mga sityo sang Barangay Sag-ang. Ang Barangay Sag-ang isa ka upland barangay kag 12 kilometros halin sa banwa. Ang footbridge nagpahapos sang iya pagtabuk halin sa ila sityo pakadto sa banwa. Daku ang iya pasalamat nga nabutangan sang taytay.

Ang footbridge nagbukas sang naligwin nga sitio pareho sang Conchita Villanueva. Ang Sitio Conchita, ang ginbulag sang Buhangin River sa barangay proper. Sa pila na ka dekada, ang Sitio Conchita nag-antus sang kabudlay sa pagpakadto sa banwa ilabi na gid kon tag-ulonan. Sila naga atubang sang paghangkat kon ang tubig sa Buhangin River magdaku. Sila nagapangita sang alternatibo nga alagyan agud malikawan ang madalom nga suba kon tag-ulolan bisan pa nga malayo agud masiguro man nga hilway sila katalagman ukon disgrasya.

Ang mga residente mapilitan kon kaisa sa pagtabok bisan delikadto kag mataas ang tubig sa suba kon may kinahanglanon sila nga balaklon sa banwa pareho sang bulong, bugas kag iban pa nga kinahanglanon sa sulod sang panimalay. Sa madamo na nga beses, si Nilda nagsakay sa hand tractor ukon karabaw agud mabuligan ang nagapangayo sang bulig nga mga manugbata indi lang sa ila nga barangay kundi sa iban pa nga mga barangay. Isa ka beses, si Nilda diutayan lang malumos samtang nagatabok sa suba bangud sa mabaskog nga daludo sang tubig sa Buhangin River. Siya kuntani magapadulong sa pihak nga sityo agud magbulig sa isa ka manugbata nga babaye. Maayo lang may nakakakita sa nga residente kag dali-dali nga ginbuligan kag gindala sa hilway nga lugar. Si Nilda yara sa 50’s nga panuigon sang natabo ini. Karon, malikawan na ang disgrasya sa suba bangud may footbridge na nga nag-angut sang Sitio Conchita Villanueva sa barangay proper. Mahapos na sa mga pumoluyo sa pag-angkon sang medikal nga serbisyo sa barangay proper kag banwa. Mahulas naman para sa mga estudyante ang pagpadulong sa ila bulothoan. Kag mahapos na ang pagdala sang mga produkto halin sa Sitio Conchita Villanueva pakadto sa banwa. Ang footbridge naghatag sang kasulhay sa mga pumoluyo kag nalikawan na ang disgrasya sa suba.