Sa isa ka barangay sa banwa sang Pototan, may isa day care worker nga ginahingalanan kay Ruby Bigel kag nag serbe na sang masobra sa 33 anyos sa pagtudlo sa mga kabataan sang “Early Childhood Care and Development.” Si Ruby nagsugod bilang volunteer day care worker sang 1989. Kag sang 2006 nangin permanent day care worker na. Sa subong 46 ka mga magagmay nga kabataan ang iya ginatudloan sa Barangay Bagacay day care center.
Gintunga sa duha ka sesyon ang mga kabataan, tag 23 ka bilog ang kada sesyon kag nagalawig sang duha ka oras ang pagtudlo. Si Ruby may duna na nga pagpalangga sa mga magagmay nga kabataan nga may edad nga tatlo ka tuig hasta sa 4 ka tuig kag 11 ka bulan. Pag lab-ot sa lima ka tuig, ang mga bata gina pa eskwela na sa mga primary schools. Wala sang nabaton nga reklamo batuk sa iya sang pag-abusar ukon pagsakit sa mga magagmay nga kabataan samtang yara sa iya pagtudlo sa day care facility.
Magluwas sa pagpalangga sa mga puya, si Ruby may isa pa gid ka sikreto kon nga-a madamo sang mga ginikanan sa Zone 3, Barangay Bagacay kag malapit pa nga mga barangay ang nag desisyon nga ila pa eskwelahon ang ila mga bata sa day care center. Ini ang maalwag kag naka aircon nga day care center. May nagakaigo nga lugar para sa pagtuon kag paghampang sang mga kabataan. Ang day care center ginpundohan sang masobra sa PHP729,000 nga grant gikan sa KALAHI-CIDSS kag masobra sa PHP11,000 nga dugang gikan sa munisipyo kag barangay.
Ang konseho sang barangay sa pag panguna ni Barangay Kapitan Victor Emmanuel Tionko nagpain sang pundo agod mapatahum ang sulod sang edipisyo paagi sa pagdugang sang mga gamit sini kag pagbutang sang isa ka air-conditioning unit. Maaliwalas kag mabugnaw sa sulod sang day care. May mga lamesa kag pulongkoan nga napintahan sang nagakalain-lain nga kolor. Madamo sang mga gamit sa pagtuon para sa mga kabataan. May ginbutang man nga isa ka television set sa day care center para makabulig sa pagtuon sang mga kabataan.
Magluwas sini, ang konseho nagpain pa sang dugang nga pundo para sa pagpaobra sang isa ka kusina sa day care center agod pwede makaluto ang mga ginikanan sang mga pagkaon ukon snacks sang mga kabataan. Kon si Day Care Worker Ruby ang pagahambalon, indi na kinahanglan magkadto pa sa banwa kag i enroll ang mga kabataan. Ang Bagacay isa ka kilometro ang kalayoon halin sa banwa. Ang mga ginikanan indi na kinahanglan mag gasto sang pamasahe pakadto sa banwa. Indi na mag-uyang sang tiyempo sa pag byahe para lang maka angkon sang edukasyon ang mga kabataan.
Subong, may duha ka mga kabataan nga halin sa Barangay Naslo nga naga eskwela sa Bagacay Day Care Center. Bangud nakita sang ila mga ginikanan nga maayo ang pagtudlo kag komportable ang mga kabataan sa sulod sang day care center. Ang sitwasyon sa sulod sang day care center sang Bagacay pareho sa isa ka pribado nga eskwelahan. May nagakaigo nga kagamitan kag maayo ang pagtudlo. Ang mga ginikanan ginatugotan man magsulod sa day care center kon ang ila mga kabataan nagahibi pa kon bayaan sa sulod sang center. Ang bago nga day care center mas mabakod ipaanggid sa daan nila nga day care center. Sang una nahimo sa kawayan kag ang salog sini indi mapag on. Kag mainit kon tag ilinit kag delikado kon tag ulolan.
Ginkalipay ni Ruby ang ginhimo nga desisyon sang mga boluntir kag konseho sa pag prioritized sang day care center bilang panguna nga kinahanglanon nga proyekto sang barangay. Ang ini nga pagbag-o sa barangay nahimo bangud sang pag-ugyon sang kumonidad. Ini nga magamay nga pag-umwad daku ang bulig agod mahatagan sang maayo nga pundasyon sang edukasyon ang mga magagmay nga kabataan.