Testimonya ni City Link Alodia R. Albia, RSW

Benepisyaryo sang 4Ps

VICTORIAS CITY, Negros Occidental – Ako si Alodia Rebatado Albia, 24 anyos tubo sang Barangay Gawahon, Victorias City, Negros Occidental kag isa na ka rehistrado nga manggagawang panlipunan (Registered Social Worker). Antis ko malab-ot ang akon gina tindugan subong akon gid madumduman tanan nga naagyan nga mga kabudlay. Ang amon pamilya simple nga gapangabuhi bisan pigado naga paninguha gid ang amon ginikanan para magaan kami sang amon mga kinanglanon. Ang akon ginikanan wala nakatapos sang ila pag-eskwela tungod sa sobra ka pigado kag kadamo sila nga mag-ululutod.

Bata pa kami pero kinahanglan na mag-palayo sang amon amay para mag-obra sa layo nga lugar para may isagod sa amon. Sa bata ko nga edad akon na namat-an ang kapigaduhon nga kis-a makita mo ang imo mga ginikanan nga grabe ang pangabudlay para lang mapakaon kag mapa-eskwela kami nga apat nga mag-ululutod. Halos indi na namon makita ang amon amay kay ato permi naga-obra sa layo. Damu nga mga birthday, recognition kag graduation sa eskwelahan nga indi siya makakadto kay mas mayuhon niya na lang nga ipadala sa amon ang iya inugplete kesa sa mag-attend sa ini nga mga okasyon para lamang absenan ang iya nga obra.

Nag-abot ang tion nga nawad-an obra ang amon amay gani nag-pauli siya sa balay para manguma. Ang amon iloy bilog nga adlaw nagapanahi para maka-income para ipabalon sa amon magkadto sa eskwelahan kag para may idugang pamakal sud-an kag bugas. Naagyan namon magkaon hanggop o lugaw, tinanok nga saging ukon bisol nga gabi nga kami mismo nagapangkutkot sa uma. Tungod sa mga naagyan nga kabudlayan akon gid gin promisa sa akon kaugalingon nga mag-eskwela gid ako sang maayo para makatapos sa pag-eskwela kag makapangita obra para makabulig sa akon ginikanan.

Sa wala namon ginalauman, isa sa daku nga grasya para sa amon ang madala kami sa Pantawid Pamilyang Pilipino Program o 4Ps kay daku gid nabulig sa amon pag-eskwela. Piyan-piyan gid sa pangabuhi sang mga pigado ang 4Ps kay nahatagan kami tsansa nga maka-eskwela sang tayuyon kag ang bug-at sang pagpangabuhi namon amat-amat nabuhinan.

Sa amo yadto nga mga tinion, tatlo kami naga-eskwela sa high school kag pwerte ang kapigaduhon tungod gadaku sang galastuhon sang kada isa sa amon. Kun kaisa bisan pulo lang kapiso ang balon maeskwela gid kami kay bal-an namon kung indi kami magpadayon asta mintras ang pangabuhi namon magapabilin lang sa amo ni nga sitwasyon. Akon gid gintingwaan nga magdako ang akon grado para makakuha sang scholarship para sa kolehiyo.

Bata pa ako gusto ko na maging isa ka maestra kay sa bata ko nga edad nakita ko nga sila ang halinan ngaa naging madinalag-on ang ila mga estudyante. Sang naka graduate na ako sa high school pwerti gid kapigado kay sang graduation ko gani ginbaligya namon ang tanan nga manok para ibayad sa akon toga kag gin-lakat lang namon papuli sa balay kay wala na kami pangplete bisan picture wala ako handumanan kay tungod wala ibayad.Halos gakawad-an na ako sang tsansa maka-eskwela sa kolehiyo kay akon ginapaminsar kung padayunon ko ang akon handum, ang tatlo ko ka utod mauntat gid sa ila pag-eskwela kay tungod indi na masarangan sang amon ginikanan ang gasto.

Tungod ang akon iloy isa ka grantee ka 4Ps nagkadto siya sa opisina nsang 4Ps didto sa banwa kag nag inquire sang scholarship sa college kag didto nakita ni Ms. Neressa Diwatin ang akon card sa eskwelahan kag siya gid mismo nag-rekomendar kag nagbulig sa akon nga mangin isa ako ka Expanded Student Grant-in-Aid Program for Poverty Alleviation (ESGPPA) iskolar. Napasar ko tanan nga examination gani natagaan ako tsansa nga maka-eskwela bisan ang kabaylo sini amo ang mapalayo sa akon pamilya.

Sa edad ko nga 15 anyos, nag-desisyon ako nga makipagsapalaran sa Capiz kun sa diin didto ako maeskwela sa Capiz State University, Pilar Campus sa kurso nga Bachelor of Science in Social Work. Lain ang akon kurso sa handum ko nga maging maestra pero kay libre ang pag-eskwela gani kahigayunan ko na ini. Tuig 2018 sang nag-gradweyt ako sa akon kurso kag sa parihas nga tuig nakapasar ako sa board kag nangin Registered Social Worker (RSW).

Indi madali ang akon inagyan para malab-ot ang akon handum. Didto ko narealize kung ano ang sakripisyo sang isa ka ginikanan para sa ila kabataan bisan layo pa sila sa ila pamilya para magaan lang ni nila mayo na pangabuhi. Mas nagtindog ako sa akon kaugalingon dala ang esperensiya sang kapigaduhon nga bisan ano kalayo kag kabudlay tapuson ko ang akon pag-eskwela. Sa kaluoy sang Diyos naka graduate ako kag nakapasar sa Board Exam nga akon gid pasindungog sa akon ginikanan kag sa 4Ps pamaagi sa ila nga City Link na si Ms. Diwatin nga nag-giya sa akon nga mangin isa ka RSW.

Abi ko pagmakatapos na ako sa akon pag-eskwela madali na lang ang tanan. Diri pa lang gali maga-umpisa ang paninguha nga maka-obra, madamu ako gin-applyan nga mga obra sa gobyerno ukon pribado nga kumpanya kag indi gali mahapos ang mangita sang obra. Permi gid ako nagapangamuyo na tani gaan na ako sang obra para makabulig na sa akon ginikanan. Sa liwat ginbuligan ako ni Ms. Diwatin nga makasulod sa Local Government Unit (LGU) sang Victorias City para mag-volunteer sa City Social Welfare and Development Office (CSWDO) samtang nagahulat sang bakante. Tuig 2019 sang ginrekomendar ako nga makaobra sa Non-Government Organization bilang isa ka RSW kag on the spot ako nga na hired. Daku gid ang akon kalipay kay may sweldo na ako kag amat-amat na nga nakabulig sa akon pamilya.

Medyo ok na kuntani kami kay may income na ako pero gulpi lang nagtuhaw ang COVID-19 pandemya rason nga nagsirado ang gin-obrahan ko kay apektado gid sila. Halos indi ko maagwanta ang kabudlay nga nagapanugod pa lang ako bulig sa akon pamilya pero gulpi lang man nag-untat. Grabe ang amon na experience sa kasagsagan sang pandemya tungod wala kami sang makuwaan panggawi sa amon sulod panimalay.

Pero bisan amo to ang akon naagyan wala ako nawad-an sang kahigayunan. Bal-an ko maka survive kami kag makaginhawa gid sa palaabuton. Daku gid ang akon pasalamat sa akon ginikanan kay wala gid ko nila gin pressure kag wala gin pabay-an sang mga oras nga halos indi ko na kaya. Sa liwat, may nag-informed sa akon parte sa bakante nga position sa LGU Pulupandan kag sang gin-applyan ko, na hired ako kag nagkapot sang mga special cases parte sa mga kabataan. Kadungan sadto wala na sang gina monitor nga bata sa amon panimalay gani nag-gradweyt naman kami sa programa tuig 2021.

Bal-an ko ang tanan nga akon inagyan nga sakripisyo may mga plano gid ina ang Diyos kay ang tanan ko na naagyan nga kabudlayan may rason kag magamit ko gid gali sa mga sitwasyon nga gaabot sa aton kabuhi. Isa sa mga handum ko amo ang makabulig balik sang tanan nga bulig sang gobyerno sa akon kag sa akon pamilya gani nag-apply ako sa DSWD kag natuman ko ini nga maging parte sang Departamento ilabi na gid sang 4Ps kay nabaton ako bilang isa ka Project Development Officer II ukon City Link sang Cadiz City, Negros Occidental sang Nobyembre 14, 2022.

Sa subong, handum ko gid mga matagaan sang mayo nga pangabuhi ang akon pamilya kag makabulig pa-eskwela sang akon duha ka utod nga naga-eskwela sa kolehiyo. Bilang isa man ka empleyado sang gobyerno, gusto ko man nga mangin instrumento sa pagbag-o sang kabuhi sang mga pigado ilabi na gid sang mga benepisyaryo sang 4Ps. Kabay pa nga parihas kay Ms. Diwatin, nga nangin inspirasyon ko, magahatag man ako sang kasanag sa mga parihas ko nga mga kubos.* Negros POO1 (MGC)