Ini nahanungod sa advertisement sa TV, facebook kag Youtube sang isa ka kandidato sa probinsya sang Iloilo. Yara sa advertisement ang isa ka babaye nga nagasuksok sang berde nga T-shirt nga may DSWD logo. Ginapahibalo namon sa publiko nga ang babaye indi empleyado sang DSWD kag indi siya konektado sa amon ahensya. Subong man, ginapahibalo sa publiko nga ang paggamit sang logo sa advertisement wala sang pahatnugot sang amon departamento.

Ang DSWD padayon nga nagapanindugan nga ini isa ka non-partisan kag apolitical nga ahensya. Wala kami sang kandidato ukon partido nga gina dampigan kag gina-endorso.

Amon man ginapahanumduman ang amon nga mga beneficiaries sa Pantawid Pamilyang Pilipino Program, Social Pension, Sustainable Livelihood Program, KALAHI (Kapit Bisig Laban sa Kahirapan) kag sa iban pa gid nga programa nga DSWD lamang ang maka-kakas sa inyo sa listahan sang mga benepisyaryo. Indi kamo magpada-dala sa mga pamahog sang sin-o man nga kakason kamo sa listahan kung indi kamo mag-suporta sa ila.

Ginapasiguro namon nga padayon kami sa pagpangalagad sa inyo paagi sa paghatag sang serbisyo para sa kaayuhan kag katin-aran sa tanan nga mga kwalipikado nga aplikante.