LIBERTAD, Antique – Indi matupungan ang kalipay sang 30 ka benepisyaryo sang Pantawid Pamilyang Pilipino Program (4Ps) kag mga miyembro man sang Organisasyon kang mga Libertadnon para sa Pag-ugwad (OLIPA) sa Sitio San Juan, Barangay San Roque, Libertad, Antique sang ila nabaton ang bunga sang ila paghimakas kag sakripisyo halin sa ila ginpatukod nga proyekto pangabuhian, ang San Juan Community Store.
Tagsa sa ila nakaganar kag naka-ambit sang ginansiya sang ila Community Store sa ginpatigayon nga “Profit Share-out” sadtong Enero 31, 2021. Ang OLIPA-San Juan Community Store isa lamang sa mga madamo nga Livelihood Associations nga gintukod para sa mga benepisyaryo sang 4Ps sa banwa sang Libertad, Antique halin sang tuig 2016 asta subong nga funded sang Sustainable Livelihood Program (SLP) nga isa sa mga pro-poor programs sang DSWD.
Ini isa ka stratehiya sang Local Government Unit (LGU) sang Libertad para sa mga benepisyaryo sang 4Ps sa tinutuyo nga mapreparar sila sa maabot nga ti-on nga sila magagradwar ukon magatapos na sa Pantawid program. Ini man isa ka pamaagi nga sila matudluan sang mga pamaagi para sa pagpapag-on sang ila mga kapasidad, abilidad, kag ihibalo sa pagpatikang sang isa ka negosyo nga sarang makabulig sa ila pang-adlaw-adlaw nga pangabuhi.
Sa halos duha ka tuig umpisa nga gintukod ang OLIPA-San Juan, masobra kwarenta mil pesos (PHP40,000) and ila nga naging kita kag ila ini gindesisyunan nga pila ka posyento sini ila igadugang sa ila kapital sa Community Store kag ang nabilin amo ang ila bahin-bahinon ukon e-share-out sa kada miyembro.
Ini isa ka prebelihiyo bilang miyembro sang asosasyon kag padya sang ila pagtinguha kag pagbinuligay. Para sa mga 4Ps beneficiaries kag miyembro sang asosasyon, indi naging madali ang ila naagyan kag nangin ekperyensya sa pagpatikang sang ila asosayon.
Madamo sila sang mga pagtilaw nga gin-atubang, mga kabudlayan nga nasugata, kag mga kapaslawan nga nalampuwasan tubtob ila naabot ang estado sang ila asosasyon sa subong. Ginakabig ini sang LGU sang Libertad, Antique nga isa ka senyales sang kadalag-an kag estorya sang pagbag-o bangod ila nakita ang mga maayo nga posibilidad nga sarang pa maabot sang sini nga asosayon kag sag iban pa nga mga asosasyon sang 4Ps sa ila banwa.
Ini isa ka maayo nga modelo sa mga kaangay sini nga asosayon kag isa ka maayo nga halimbawa sa ila tanan. Para sa mge benepisyaryo sang 4Ps, ang ini nga kadalag-an isa ka indikasyon nga ang mga benepisyaryo sang programa may ara na ikasarang kag kapasidad sa ti-on nga sila makagradwar sa programa kag ini nagapakita man nga ang isa ka LGU, kaangay sang banwa sang Libertad handa kag may ikasarang nga magpatigayon sang mga programa kag serbisyo para sa mga benepisyaryo sang 4Ps kag iban pa nga mga pigado kag nagakinahanglan nga sector sang ila kumunidad.
Ang mga benepisyaryo sang 4Ps amat-amat na nga may pagbag-o. Ang ila pangabuhi kag pangabuhian nagasanyog tungod sang mga insakto nga programa sang gobyerno kaangay sini nga asosasyon. Labaw sa tanan, nakita kag nabatygan sang mga benepisaryo sang 4Ps ang pagbag-o sag ila sitwasyon kag pangabuhi bunga sang ila pagpanikasog sa pangabuhi kag pagbinuligay sa mga hilikuton kaangay sang pagpasanyog sang ila livelihood association nga ila mangin sandigan sa ti-on nga magatapos na sila sa programa.// Ginsulat ni: Rafy D. Parpa, RSW PDO II/ Municipal Link Libertad, Antique POO. (old photo file used)